Nag-organisar ang Department of Environment and Natural Resources – Environment Management Bureau (EMB) sang isa ka daku nga post-election cleanup drive agud matipon ang mga tarpaulin, streamer, kag iban pa nga mga materyales sa kampanya nga nabilin sa sulod sang 90-adlaw nga panahon sang kampanya.
Kasunod ini sang mandu ni DENR Secretary Maria Antonia Yulo-Loyzaga sa diin ginmanduan sini ang EMB nga pangunahan ang pagkolekta, pag-recycle, kag pag-repurpose sang mga campaign materials.
Gilayon nga gin-mobilize sang EMB director Jacqueline Caancan ang tanan nga regional offices sang EMB agud magpatigayon sang cleanup drive.
Magalawig tubtob sa Mayo 17 ang masangkad nga pagpanglimpyo.
Kalakip sa mandu ni Caancan sa tagsa ka EMB regional office amo ang opisyal nga report sa volume sang mga campaign materials nga nakolekta kag kon sa diin ini ipadala para sa recycling kag repurposing projects.
Isa sa mga sistema nga pagagamiton amo ang mga lokal nga opisina sang EMB nga magbuligay sa mga lokal nga panguluhan para sa nagakaigo nga pag-recycle kag paggamit sang mga materyales sa kampanya sa mas produktibo nga mga proyekto.
Dugang ni DENR Sec. Loyzaga, pat-od nga mahimo angnapabay-an nga mga materyales sa eleksyon sa kanal, kag bisan diin, ang posible magtuga sang dugang nga polusyon kag halit sa palibot.
Magluwas sa DENR, nagpanawagan man ang grupo sang EcoWaste Coalition sa mga kandidato nga balikan ang ila campaign posters nga ginsab-it kag ginbilin sa nagkalain-lain nga lugar.
