𝗜𝗟𝗢𝗜𝗟𝗢 — Nagalaum ang Department of Environment and Natural Resources (DENR) Region VI nga sa tuig 2028 malab-ot sang ahensya ang 309,000 hectares nga target nga matanoman sang kahoy.
Sa interview sang Bombo Radyo kay Director Raul Lorilla, Officer in Charge kag Regional Executive Director Department of Environment and Natural Resources Region VI, iya ginpahayag nga sa kabug-usan nga 309,000 hectares nga target, yara na sa 118,000 ang natamnan sang kahoy umpisa sang ginsugodan ang program sang 2011 tubtob 2023.
Suno kay Lorilla, nagakadapat nga ang reforestation sang national green program ang updan sang forest protection agud malab-ot ang natural regeneration.
Ginpahayag man sini nga nagaplano ang ahensya nga maki-angot sa non-governmental organization (NGO) kag iban nga mga ahensya sang gobyerno agud nga mapasangkad ang amo nga programa.
Nagpalab-ot man ini sang mensahe sa publiko nga magkoordinar sa pag-amlig sang mga kakahoyan kag palibot agud nga ma-address ang madasig nga pagbag-o sang kilma sa Pilipinas kag bug-os nga kalibutan.
Plano naman sang natungdan nga i-implementar ang public transform kon sa diin ginhalimbawa sini ang Bucari sang banwa sang Leon nga sa subong, makit-an nga nagasanyog sa patag sang eco tourism.
Nahibaluan nga santo sa data sang Global Forest Watch, sugod sang 2001 tubtob sa 2023, ang Pilipinas ang may nadulaan sang 1.47 million hectares sang puno nga nagnubo sang 7.9%.
