ILOILO– Ginlunsyar sang Department of Agriculture ang bag-o nga programa nga Stranded Survival Rehabilitation Assistance Program nga magahatag sang kahigayunan sa mga mangunguma nga mabuligan may kaangtanan sa pagnubo sang presyo sang humay.
Sa interview sang Bombo Radyo kay Remelyn Recoter, regional executive director sang Department of Agriculture Western Visayas, iya ginpahayag nga may yara sang gintalana nga P1.5 billion para sa nasambit nga programa kun sa diin, 100,000 nga rice farmers sa bilog nga pungsod ang makabenepisyo.
Gin-athag ni Recoter nga ang mangunguma nga mahimo makabaton ang may yara lang sang magamay nga tunaman sang humay.
Suno kay Recoter, ang nasambit nga programa ang isa sa mga lihok agud mabuligan ang mga naga-agunto nga mangunguma.
Magluwas diri, magapanagtag sang mga binhi ang Philippine Rice and Reasearch Institute sa mga mangunguma sa rehiyon 6.
Samtang nagalaum naman ang Department of Agriculture nga mahagan-hagan ang problema sang mga mangunguma sa tion sang El Ni隳 paagi sa Solar Powered Irrigation System nga ginatukod sa Dingle kag Pototan.
Ginalauman nga matapos kag maturn-over sa mga mangunguma ang nasambit nga proyekto subong nga tuig.
