Iloilo – Target sang gobyerno nga padasigon ang pagpanagtag sang masobra 134,000 ka mga titulo sang duta para sa linibo ka mga benepisyaro subong nga tuig.
Sa pagbisita sang Department of Agrarian Reform sa Western Visayas, nagpanagtag ini sang 1,300 ka mga titulo sang duta sa mga benepisyaryo sa Passi City.
Magluwas sa pagpanagtag sang titulo sang duta, ginturn-over man sang Department of Agrarian Reform ang farm-to-market roads project nga nagdangat sa P100 million, farm machineries and equipment nga nagdangat sa P14,357,636.50 pinaagi sa Sustainable and Resilient Agrarian Reform Communities project sa mga pili nga Agrarian Reform Beneficiaries Organizations sa probinsya sang Iloilo.
Sa interview sang Bombo Radyo kay Agrarian Reform Secretary Conrado M. Estrella III, iya ginpahayag nga paagi sa House Bill No. 6336 kag Senate Bill No. 1853 ukon ang New Agrarian Emancipation Act, indi na kinahanglan nga baydan pa sang mga benepisyaryo ang amortization, interest payments, surcharges kag penalties sang existing loan sang ila tagsa ka mga duta.
Suno kay Estrella, ginadebatehan na sa senado ang pagpasa sang amo nga hagna.
Samtang, ginalauman nga maaprubahan sa senado ang New Agrarian Emancipation Act nga mahimo makabulig sa mga agrarian reform beneficiaries nga indi pa bayad kag may bilin nga amilyar kag interes ang duta nga gina-istaran.
