𝗜𝗟𝗢𝗜𝗟𝗢 — Ginkumpirma sang Department of Agriculture (DA) Region 6 nga nagsugod na sila sang cloud seeding sa Panay Island.
Sa interview sang Bombo Radyo kay Director Dennis Arpia, Regional Director sang Department of Agriculture (DA) Region 6, iya ginpahayag nga apisar nga nagdeklara na ang Philippine Atmospheric, Geophysical, and Astronomical Services Administration (PAGASA) sang opisyal nga pagsulod sang tig-ululan, magapadayon sila sa gihapon sang cloud seeding.
Suno kay Arpia, P6 million ang ginpain nga pondo para sa cloud seeding apang posible pa ini madugangan kun kinahanglanon sang ahensya.
Ginpahayag man sini nga magalawig sang 15 ka adlaw ang amo nga aktibidad, apang indi pa matumod kun san-o maga-epekto sa Panay.
Tuyo naman sang tikang nga mabuligan ang mga farmers nga wala sang irigasyon ilabi na ang mga naapektohan sang El Niño Phenomenon.
Sa subong, ginatuktokan sang ahensya ang Iloilo bangud ini ang isa ka high Island kag mas madamo ang naapektohan nga mga mangunguma sang nagligad nga tig-ilinit.
Gin-athag man Arpia nga wala sang may ginpatuman nga cloud seeding sang tinalikdan nga tuig bangud wala sang may nakita nga sea of double clouds.
