ILOILO CITY – Ginatun-an sang Department of Agriculture (DA) nga magpatuman sang suggested retail price (SRP) sa pila ka mga agricultural products agud nga maproteksyunan ang mga kunsumidor sa padayon nga nagasaka nga presyo sini.
Suno kay DA Undersecretary Kristine Evangelista, ang gina-target nga mga produkto amo ang presyo sang baboy, sibuyas kag sugar products.
Nagpasalig ang DA sa mga stakeholders nga magakonsulta anay sila antes magpatuman sang SRP sa mga nasambit nga mga agricultural products.
Dugang pa ni Evangelista, base sa pagpakig-istorya sang ahensya sa mga producers, ang presyo sa farm gate ang padayon nga nagasaka.
Apang, may yara sang pila ka mga retailers nga nagakabalaka sa SRP bangud nga mabudlay para sa ila ang magpatuman sini bangud sang nagkalain-lain nga presyo sang mga suppliers.
Magluwas sa SRP, ginalantaw man sang DA ang posibilidad nga mag-import sang sugar supplies agud nga ma-stabilize ang presyo sa merkado.
Suno kay Evangelista, ang presyo sang kalamay ang hambalan pa subong nga adlaw upod ang mga stakeholders bangud kinahanglan anay nga siguraduhon kag may yara sang nagakaigo nga inventory sang sitwasyon sang suplay.
