ILOILO CITY – May na-monitor na nga pagtaas sang presyo sang produktong agriklutura sa Iloilo bangud sa epekto sang nagataas nga presyo sang gatong sang pungsod.
Kabahin sang nagmahal nga produkto amo ang kamatis, okra, cabbage, baguio beans, siling labuyo, kalamay kag mantika.
Samtang nagnubo naman ang presyo sang pork ham, itlog sang manok kag pila ka panakot sang pinakbet.
Sa interview sang Bombo Radyo kay Mr. James Earl Ogatis, Regional Information Officer sang Department of Agriculture (DA), iya ginpahayag nga bangud sang nagataas nga presyo sang gatong, nagataas man ang production cost sang sini nga mga produkto.
Nagapabilin naman nga wala sang paghulag sa presyo sang bugas, mais kag isda.
Samtang, ginpapreparar na sang Department of Agriculture ang listahan sang mga mangunguma nga makabaton sang fuel subsidy nagikan sa gobyerno.
Sa Western Visayas, may yara sang 3, 222 ka mga farmers nga ginlauman nga makabaton sang ayuda.
Nagpaathag naman si Ogatis kun ngaa nga ang mga mangunguma nga nagatanom sang mais kag ang mga manugpangisda gid lamang ang mahatagan sang subsidy.
Suno sa iya, may yara na sang ongoing assistance para sa mga nagatanom sang humay kag may yara man sang ginabulig ang gobyerno para sa mga nagatanom sang high value crops.
