Gin-aprubahan sang Department of Agriculture (DA) ang 13 ka mga kompanya halin sa pungsod sang Chile agud mag-export sang karne pakadto sa Pilipinas.
Suno sa DA, ginhatagan sang tatlo ka tuig nga akreditasyon ang mga kumpanya halin sa Chile agud makapag-eksport sang karne kaangay sang baka, baboy, kag manok kag iban pa nga by-products para mas ma-diversify ang mga pagkaon sa sulod sang pungsod sa tunga sang kakulangan sang supply kag sakit sang mga kasapatan.
Sa pahayag ni Department of Agriculture Secretary Francisco Tiu Laurel, bisan nagapaninguha man ang pungsod nga mag-produce sang mas madamo nga pagkaon kaangay sang karne, kinahanglan man sang iban pa nga source halin sa iban nga pungsod.
Dugang man niya nga nagapahanumdom ang mga kalamidad nga nagakalatabo sa subong kun ano ka importante ang mga alternative food supply channels.
Gin-athag niya man nga ang Chile nakatuman sa standards sang World Organization for Animal Health, kag ang mga kumpaniya nakapasar man sa quarantine kag meat inspection requirements sang Pilipinas.
Nangin kabahin ang Chile sa global network sang suppliers sang karne sang Pilipinas, upod ang Estados Unidos, Canada, Brazil, kag Spain.
