ILOILO CITY – Ginalantaw sang Department of Agriculture ang posibilidad nga mag-import sang karne sang baboy para sa ika-apat nga quarter sang 2023 kasunod sang 10-day deficit bangud sang African Swine Fever.
Suno kay Department of Agriculture Spokesperson Assistant Secretary Arnel De Mesa, ang pag-import ang makasolbar sang kakulangan ilabi pa nga nagataas man ang demand sang baboy sa holidays.
Samtang, ginpahayag naman sang mga importers nga ang importing ang indi na makabulig pa bangud nga sa January 2024 pa maabot ang gin-order subong nga period.
Suno kay Jess Cham nga president emeritus sang Meat Importers and Traders Association, nagabag-o ang market gani ang kakulangan ang magaresulta sa pagsaka sang presyo nga magapanubo naman sang demand.
Mahimo man nga magkaon nalang sang iban nga protein kaangay sang manok ukon isda.
Ginatsekyar man sang agriculture department kun kinahanglan pa nga magpatuman sang suggested retail price para sa baboy.
Nagpabutyag man sang pagkabalaka ang Samahang Industriya ng Agrikultura nga posible may matabo nga pork deficit bangud nga wala na sang bastante nga suplay sang baboy sa mga cold storages.
Suno sa grupo, dapat nga magtutok ang gobyerno sa pag-establish sang border inspection facilities.
