ILOILO CITY- Nadulaan na sang paglaum ang Ilonggo solon nga isa sa mga authors sang hagna nga nagaduso sang pagtukod sang Department of Disaster Resilience nga mapasar pa ini.
Sa interview sang Bombo Radyo kay Iloilo 3rd District Representative Lorenz Defensor, iya ginpahayag nga indi ini ang husto nga tion nga magtukod sang bag-o nga departamento bangud sa problema nga ginaatubang sang pungsod kaangay sang pandemya kag kalamidad.
Suno sa iya, may yara man sang bersyon sang kasubong nga hagna ang Senado apang wala ini ginapaboran sang mga senador bangud sa tion nga matigayon ang nasambit nga hagna, magakinahanglan na naman sang dugang nga pondo para diri.
Ginpahayag naman ni Defensor nga sa subong, mas maayo nga pondohan nalang sang maayo ang mga ahensya sang gobyerno nga nagapanguna sa pagbulig sa mga biktima sang bagyo.
Ginrekomendar man niya nga hatagan sang dako nga pondo ang Local Government Units nga direkta nga apektado sang kalamidad para sa mas madasig nga disaster response.
