Hinali nga nagluntad ang power outage sa Department of Energy (DOE) samtang ginapatigayon ang press conference kun sa diin gina-istoryahan ang bastante nga suplay sang kuryente sa pungsod.
Natabo ini subong nga Huwebes, Mayo 15, samtang nga nagasabat gid ang energy officials sa mga pamangkot sang reporters kaangot sa abilidad sang grid nga malab-ot ang nagasaka nga electricity demand sa Pilipinas.
Naglab-ot pa sa dies minutos ang kalawigon sang pagka-utod sang suplay sang kuryente antes ini nabalik sa building.
Paathag ni Energy Secretary Raphael Lotilla, isa lamang ka “isolated incident” ang natabo nga power outage.
Dugang sini, ang naapektuhan lamang amo ang Building 5 sang Philippine National Oil Company sa sulod sang DOE compound sa Taguig City.
Naglahog man ini nga posible nga wala nasarangan sang electrical infrastructure nga ma-handle ang electrical needs sang equipment sang mga journalists nga yara sa hulot kun sa diin may presscon.
“I think this particular room… the power demand surge from all of your equipment. So we will take that into account for next time,” pahayag sang energy secretary kasunod sang hitabo.
Nagpaguwa naman sang statement ang power distributor nga Manila Electric Company: “(There) appears to be a problem with (the) load side facility, as our crews found a blown fuse at the building.”
Nahibaluan nga santo sa forecast sang DOE, ang power demand sa Luzon ang magalab-ot sa 14,769 megawatts (MW) sa tunga sang mainit nga tyempo. Ini ang 5% nga mas mataas sa peak demand sang 2024 nga yara sa 14,016 MW.
Sa pihak nga bahin, ginsiling nga ang peak demand naman ang magalab-ot sa 3,111 MW sa Visayas kag 2,789 MW sa Mindanao.
