Atty. Gilbert Gumabay, Regional Director of Bureau of Local Government Finance (BLGF)-6
ILOILO CITY – Nagpatunga na ang Department of Finance (DOF) sa problema sang Iloilo City Government tuhoy sa wala naswelduhan nga mga job hire.
Ini matapos nga nakalab-ot mismo kay Presidente Rodrigo Duterte ang tuhoy sa nasambit nga problema.
Sa interview sang Bombo Radyo kay Atty. Gilbert Gumabay, Regional Director sang Bureau of Local Government Finance (BLGF)-6, iya ginpahayag nga siya ang ginmanduan sang presidente nga amo ang magapatunga sa kampo nanday Mayor Jose Espinosa III kag City Treasurer Jinny Hermano.
Ginpahayag ni Gumabay nga iya himay-himayon kag usisaon ang panindugan sang magtimbang nga kampo tuhoy sa sweldo sang mga job hire.
Ang City Treasurer suno kay Gumabay amo ang may katungdanan sa pagdumala sang pondo sang syudad.
Bangud sini, ginpahayag ni Gumabay nga iya sapolon ang magtimbang nga bahin agud nga maka-angkon sang kasugtanan kun ano ang madangatan sang sweldo sang mga job hire nga nagtranaho humalin sang Enero tubtub Marso subong nga tuig.
Sa baylo nga win-win solution, ginpahayag ni Gumabay nga sundon sang BLGF ang legal basis sa pagpaguwa sang desisyon.
