Pataasan ang buwis sa mga e-cigarettes, vaping products lakip man ang makahulubog nga ilimnon.
Suno kay Karl Chua, undersecretary sang Department of Finance, ang pagpataas sang buwis sa mga nasambit nga produkto isa ka paagi agud madugangan ang pondo sang universal healthcare.
Dugang pa sang natungdan, indi bastante ang pagtaas sang buwis sa tobacco sang nagligad agud madugangan ang pondo sang universal healthcare.
Magataas sang P45 kada 10 mililiters humalin sa P10 per mililiters nga gin aprubahan sang Kongreso ang buwis sa e-cigarettes kag vaping products.
Samtang ang beer humalin sa P24 mangin P34 kada litro kag magataas pa gid sa P45 kada litro sa tuig 2021.
Ini ang magataas sang P5 sa mga masunod nga tuig tubtub makalab-ot ini sang P60.50 sa tuig 2024 kag pataasan pa sang 10% kada tuig.
Magataas man ang buwis sa makahulubog nga ilimnon kaangay sang distilled spirits ukon hard liqours.
Ang ad valorem tax sang mga nasambit nga ilimnon ang magataas humalin sa 20% pakadto sa 25% samtang ang specific tax rate naman ang magataas halin sa P23 nga mangin P40 kada litro.
Ang pag-amyenda sang sin tax law ang gin pasar sang 17th Congress kag nagahulat nalang nga pirmahan ni Presidente Rodrigo Duterte.
Ang nasambit nga layi ang magapataas sang buwis sang sigarilyo sang P45 kada pakete sa tuig 2020, P50 kada pakete sa tuig 2021, P55 kada pakete sa tuig 2022 kag P60 kada pakete sa tuig 2023.
Madumduman nga naglahog ang presidente sa iya ikaapat nga State of the Nation Address nga luyag niya kakason kag dulaon ang mga naga panigarilyo.
