ILOILO CITY – Gina-engganyo sang Department of Health Region VI ang publiko nga magpatigayon na lamang sang community fireworks sa pagsugata sang bag-o nga tuig.
Ini ang may kaangtanan sa ‘Oplan Iwas Paputok’ campaign sang ahensya.
Sa interview sang Bombo Radyo kay Dr. May Ann Sta. Lucia, OIC Chief sang Local Health Support Division sang Department of Health Region VI, iya ginpahayag nga epektibo sa gihapon ang Executive Order No. 28 ni anay Presidente Rodrigo Duterte nga naga-provide sang Regulation and Control of the Use of Firecrackers and other Pyrotechnic Devices.
Lakip sa mga probisyon sini amo ang pagbutang sang community fireworks displays nga iga-supervise sang trained person nga lisensyado sang pulis.
Suno pa kay Sta. Lucia, mahimo man nga makagamit sang musical instruments kag sang iban pa nga naga-produce sang sound.
Ginpasiguro naman sang ahensya nga ang mga ospital ang ipaidalom sa high alert status para sa mga indibidwal nga mapilasan kag sa emerhensya sa New Year celebrations.
Sang nagligad nga tuig, ang Negros Occidental ang may pinakamadamo nga na-record nga firecracker-related injury nga may 60 ka kaso kag ginasundan sang Iloilo nga may 33.
