ILOILO CITY – Ginpaathag sang Department of the Interior and Local Government sa Iloilo City nga mahapos gid lamang ang proseso sang pag-apply para sa authority to travel para sa mga opisyal nga may personal nga lakat sa luwas sang pungsod.
Ang authority to travel abroad ang kinahanglan sa tion nga yara sa national state of emergency ang pungsod.
Sa interview sang Bombo Radyo kay Mr. Oscar Lim, director sang Department of the Interior and Local Government- Iloilo City, iya ginpahayag nga sa kaso sang mga city councilors, kinahanglan lang nga i-presentar sa ila talatapan ang approved leave of absence nagikan sa Office of the City Vice Mayor.
I-process ini sang Department of the Interior and Local Government kag ipasa sa ila central office.
Apang suno kay Lim, dapat nga mag-apply 10-15 days antes ang paglakat agud nga mahatagan sang ligwa ang pagpirma sa national office kag agud nga malikawan nga ma-pending sa Bureau of Immigration.
Pahayag dugang niya, wala man sang may gina-disapprove nga application.
Sa kaso ni Iloilo City Councilor Urminico “Nick” Baronda suno kay Lim, wala sang may nabaton nga application ang ila nga opisina.
Sa tion nga magpasaka sang kaso administratibo si Councilor Plaridel Nava sa Ombudsman ukon sa Ethics Committee, hatagan sang kopya sang complaint sang Department of the Interior and Local Government- Iloilo City ang ila regional office, i-assess kag depende na sa ila kun i-forward nila sa national office.
Kung madumduman, ginpahayag ni Councilor Nava nga pasakaan niya sang kaso si Baronda bangud nga nagtambong ini sa special session sang Disyembre 28, 2022 apisar nga wala naka-file sang leave of absence kag wala sang authority to travel abroad ilabi pa nga yara sa state of calamity ang pungsod bangud sang Coronavirus disease 2019.
Ang state of calamity ang nagtakup sang Disyembre 31, 2022.
