ILOILO CITY – Nagaplano ang Department of Justice nga ipaidalom sa international lookout bulletin si Negros Oriental Representative Arnolfo “Arnie” Teves Jr. sa masunod nga semana.
Suno kay Department of Justice spokesperson Atty. Mico Clavano, ang tanan nga mga may kaangtanan sa kamatayon ni Negros Oriental Governor Roel Degamo ang posible nga ipaidalom sa INTERPOL Blue Notice.
Ini agud nga mahibaluan sang ahensya ang hulag sang mga respondents mga mahimo may kaangtanan sa kamatayon ni Degamo kag mahimo nga magamit sa imbestigasyon.
Ang color-coded notice suno sa website sang International Criminal Police Organization, amo ang international requests para sa kooperasyon ukon alerts kun sa diin, mahimo nga mag-share sang critical crime-related information ang police sa member countries.
Sa Blue Notice, makatipon sang dugang nga impormasyon sa identity sang isa ka tawo, ang iya nahamtangan ukon aktibidad may kaangtanan sa isa ka criminal investigation.
Una na nga ginpahayag ni Justice Secretary Jesus Crispin Remulla nga nakabiya na sa Estados Unidos si Teves kag yari na sa isa ka pungsod nga sakup sang Asya.
Nagalaum ang ahensya nga magabalik na sa pungsod si Teves kasunod sang panawagan ni Speaker Martin Romualdez nga magpauli na sa pungsod kag atubangon ang mga akusasyon batuk sa iya.
Kung mahimo, ang Department of Foreign Affairs ang maga-request nga i-deport si Teves sa pungsod kun sa diin siya subong.
Nahibaluan nga may yara na sang criminal complaints nga gin-file batuk kay Teves kag sa anum ka iban pa nga na-aresto sa sunud-sunod nga raids nga nagresulta sa recovery sang madamo nga armas kag explosives nagikan sa iya balay sang nagligad nga semana.
Isa diri ang ginbasura na may kaangtanan sa illegal possession of firearms matapos nga nahibaluan nga ang iban sa mga recoveries ang indi iya sang kongresista.
Ang duha ka mga arestado nga suspek nga sanday Joric Labrador kag Benjie Rodriguez nga lunsay mga anay soldado ang nagbuyagyag nga isa ka certain “Cong Teves” ang nagmandu sa pagpatay kay Degamo.
Ginpanginwala na ni Teves nga siya kag ang iya utod nga si Henry ang may kaangtanan sa pagpatay kay Degamo sa pihak sang mga alegasyon nga ang krimen ang politically motivated.
Ang mga Teves ang political rivals sang Degamo family.
Sang damlag lang, nag-request si Teves sa House of Representatives nga hatagan siya sang duha ka bulan nga leave of absence bangud sa “very grave threat” sa iya kabuhi kag sa iya pamilya.
