ILOILO CITY – Nagkuha sang third party ang Department of Public Works and Highways Region VI agud nga mag-imbestigar sa problema sa Ungka flyover.
Sa interview sang Bombo Radyo kay Iloilo City Councilor Ely Estante, chairman sang Project Monitoring Council sang National Economic Development Authority sa Iloilo City, iya ginpahayag nga ang third party ang ginabug-usan sang mga structural engineers, architects, nagikan sa academe kag iban pa nga mga experts.
Hatagan sila sang kontrata sang Department of Public Works and Highways kag magapatigayon sila sang imbestigasyon.
Ang resulta sang imbestigasyon sang grupo ang mangin basehan sa pagkay-o sa flyover.
Sa katapusan sang tuig, ginalauman nga matapos na ang imbestigasyon apang ang pagkay-o sa problema sang flyover ang posible nga sa madason pa nga tuig.
Ginpahayag dugang ni Estante nga sa tion nga 60 percent ang damage, gub-on gid ang flyover.
Ginkumpirmar man ni Estante nga ang Department of Public Works and Highways amo ang magasto sa pagbayad sa third party.
Samtang, ginalantaw pa sang council kung may yara sang salabton ang contractor nga International Builder’s Corporation.
Una na nga ginpahayag sang ahensya nga wala sang salabton ang contractor bangud nga ginsunod lamang nila ang orihinal nga design.
Apang suno kay Estante, lantawon kun bala ang mga kaangay sang kalidad kag kantidad sang construction materials ang ginsunod man sang contractor.
Samtang, sa Lunes, magapatigayon sang high level technical meeting ang Regional Project Monitoring Council may kaangtanan sa Ungka flyover.
Sa interview sang Bombo Radyo kay Estante, iya ginpahayag nga hambalan sa amo nga pagsinapol ang mga nangin obserbasyon kagina sa ginpatigayon nga inspection upod ang nagkalain-lain nga ahensya.
Lakip sa obserbasyon amo nga dapat nga kuhaon ang mga naga-park nga salakyan sa idalom sang flyover.
Ang mga naga-park nga salakyan ang makabig nga hazzard sa lugar.
Indi naman mahimo suno kay Estante nga siraduhan ang dalan bangud nga wala na sang may nabilin nga access.
POSIBLE NGA MAY MOVEMENT SA DALUM
Posible nga may yara na sang movement sa idalom rason nga nagbawod ang shoring nga ginbutang sa Ungka flyover.
Sa interview sang Bombo Radyo kay Engr. Nilo Jardeleza, member sang Infrastructure Development Committee sang Regional Project Monitoring Council, iya ginpahayag nga posible nga wala natungkad sang board pile ang katig-a sang duta.
Bangud nga madugay man ang pagkay-o sang flyover, nagbawod ang shoring nga resulta sang movement.
Ang isa sa ginlantaw nga solusyon amo ang concrete jet grouting.
Sa jet grouting, may yara sang itubsok nga tubo tubtob nga malab-ot ang matig-a nga duta kag amo ang pag-inject sang semento.
Sa subong, gintabunan na sang trapal ang portion sang flyover kun sa diin makita ang nagabawod nga suporta sang flyover.
