ILOILO CITY – Wala sa gihapon nakasabat ang Department of Public Works and Highways Region 6 sa ginapangayo nga paathag ni Pavia Sangguniang Bayan Member Jose Maria ‘Pyt’ Trimañez kun ngaa nga nagliw-as ang isa sa mga girders sa Aganan Flyover.
Nahibaluan nga sang ginpatigayon nga committee hearing sang Committee on Transportation sang Septyembre 29, ginpakita ni Trimañez ang picture sang nagaliw-as nga girder no. 3 sa mga tiglawas sang Department of Public Works and Highways Region 6 kag nagpasalig man ang mga ini nga balikan lamang siya.
Sa interview sang Bombo Radyo kay Trimañez, iya ginpahayag nga tubtob subong nga adlaw, Oktubre 6, wala sa gihapon si Trimañez sang may nabaton nga sabat.
Bwas nga adlaw, magapatigayon sang pagsinapol si Iloilo City Councilor Atty. Sedfrey Cabaluna nga amo ang chairman sang Committee on Transportation sa Sangguniang Panlungsod upod sa mga committee chairs sa mga banwa nga kaiping sang syudad.
Imbitado man ang Department of Public Works and Highways Region 6 kag nagalaum si Trimañez nga yara ang mga opisyal sang ahensya nga makasabat sang tul-id may kaangtanan sa problema sa flyover.
Kung madumduman, sa katapusan nga committee hearing sang Committee on Transportation sang banwa sang Pavia, wala nagtambong si Department of Public Works and Highways Region 6 Assistant Director Engineer Jose Al Fruto nga amo kuntani ang maga-detalye sang proyekto.
Ang duha lamang ka mga field engineers ang ginpadala sa committtee hearing nga limitado lamang ang ila sabat.
