ILOILO CITY– Ginpatpat sang Department of Tourism ang ila katungdanan may kaangtanan sa pagpauli sang Overseas Filipino Workers gikan sa Metro Manila.
Sa interview sang Bombo Radyo kay Department of Tourism Region 6 Director Atty. Helen Catalbas, iya ginpahayag nga santo sa mandato sang central office, sila sa region 6 ang magapangita sang hotel bilang temporaryo nga quarantine facility para sa mga OFW kag seafarers.
Suno kay Catalbas, ang nakapasa sang survey may kaangtanan sa hotel amo ang probinsya sang Antique, Aklan, Guimaras kag Capiz, samtang wala naman nakapasa ang Negros Occidental, Bacolod City, Iloilo Province kag Iloilo City.
Ginpahayag ni Catalbas nga nakumbinse ang identified hotels nga magbukas kag magbaton sang repatriates sa tion nga matapos na ang ila kontrata sa paghatag sang temporaryo nga billeting area para sa empleyado sang Business Process Outsourcing.
Ginpasalamatan ni Catalbas ang mga hotel bangud sa ila kahandaan sa pagbaton sang OFWs kag bilang pagpasalamat, magapa-in siya sang budget para sa disinfection.
Samtang, amat-amat na nga ginpapauli ang mga stranded nga turista sa rehiyon kun sa diin ang Western Visayas ang may pinakamadamo nga tourist strandees nga nagdangat sa halos 3,000.
