ILOILO CITY – Igalunsyar sang Department of Tourism ang bag-o sini nga kampanya agud mapasanyog ang mga Pilipino kag kultura sang Pilipinas nga magabulos sa iconic tagline nga, “It’s More Fun in the Philippines”.
Suno kay Tourism Secretary Christina Garcia-Frasco, maid-id pa nga ginaplanuhan ang kampanya sa diin magapatigayon ang ahensya sang market study kaupod sang global trends sa pagbiyahe kag turismo matapos ang coronavirus disease 2019 pandemic.
Nahibaluan nga humalin pa sang 2012 ang kampanya sang gobyerno sa kinaandan nga tourism campaign.
Ginpahayag dugang sang natungdan nga posible nga mapagwa na sa masunod nga semana ang bag-o nga campaign matapos nga maaprubahan ang National Tourism Development Plan for 2023–2028.
Ginpakigbahin man ni Frasco nga matapos ang lockdown, mas nangin interesado ang mga turista sa substantive, immersive, kag authentic cultural experiences.
Dako ang pagpati sang Tourism Secretary nga mahimo nga makaginansya ang Pilipinas sa ginalauman nga tourism boom nga naga-target sang 4.8 million international tourists subong nga tuig matapos nga narecord ang 2.65 million visits sang 2022 kun sa diin ginalauman man ang 100% recovery sa domestic tourism.
Natalana naman nga maglunsyar ang Department of Tourism sang mobile application sa diin mahimo ini nga magamit agud ipanggid ang interes sang mga ini sa naluyagan nga destinasyon sa Pilipinas.
