ILOILO – Nagpaandam ang Department of Trade and Industry sa mga negosyante nga likawan ang pag-hoard sang mga groceries antes ang paglaslas sang Bagyo Mawar sa Pilipinas.
Ini matapos natukiban sang ahensya nga may yara sang pila mga negosyante nga nagabakal sang madamo nga mga produkto agud makabenepisyo sa palaabuton nga price increase ilabi na kun may yara sang kalamidad.
Suno kay Trade and Industry Undersecretary Ruth Castelo, nagapasiguro ang ahensya nga mapun-an ang tanan nga baligyaan sang mga food and non-food items bilang preparasyon sa bagyo.
Ginpahayag dugang sang natungdan nga mahimo i-report sang publiko ang mga indibidwal nga nagapang-hoard kag may intensyon nga ibaligya ang mga produkto sa mas mataas nga presyo.
Samtang, nakahanda naman ang ahensya nga magpatuman sang price freeze sa mga basic necessities sa tion nga mag-deklarar ang local government unit sang state of calamity.
Nahibaluan nga sa idalom sang Republic Act No. 7581 ukon ang Price Act, ang presyo sang mga basic necessities ang automatically frozen sa kinaandan nga presyo sa sulod sang 60-ka adlaw sa tion nga madeklarar ang lugar sa State of Calamity.
Pila sa mga basic necessities amo ang delata nga isda, locally manufactured instant noodles, bottled water, tinapay, processed milk, kape, kandila, laundry soap, detergent, kag asin.
