ILOILO CITY – Gindula sang Department of Trade and Industry ang kahangawa sang publiko sa posible padayon nga pagsaka sang presyo sang basic goods kag commodities.
Suno kay Department of Trade and Industry Assistant Secretary for Consumer Protection Group Amanda Nograles, wala na sang may matabo nga price increase sa nabilin nga bahin sang 2023 apisar sang nagatambak nga requests nagikan sa manufacturing sector.
Pahayag niya, 18 ka mga manufacturers ang naga-ayo nga pasakaan presyo sang 63 ka mga produkto ukon stock-keeping units.
Ini ang ginalakipan sang nagkalain-lain nga brand sang canned sardines, canned meat, kape, processed milk, tinapay, instant noodles, bottled water, condiments, toilet soaps kag batteries.
Dugang pa sang natungdan, nagsugot na ang mga manufacturers nga i-hold anay ang pagpasaka sang presyo tubtob sa katapusan sang tuig.
Nagpasalig man si Nograles nga pangitaan sang ahensya sang paagi agud nga mabuligan ang mga manufacturers nga mapanubuan ang ila production kag operating costs.
