ILOILO CITY — Wala sang kasiguraduhan ang Department of Public Works and Highways (DPWH) Region 6 kun san-o nila matapos ang modification kag restoration sang kontrobersyal nga Aganan kag Ungka Flyover sa Pavia, Iloilo.
Ini kasunod sang ginhiwat nga session sang Sangguniang Bayan sang Pavia, Iloilo subong nga adlaw tuhoy sa mga nasambit nga proyekto.
Sa interview sang Bombo Radyo kay Pavia Sangguniang Bayan Member Jose Maria ‘Pyt’ Trimañez, iya ginpahayag nga ang pagpanigurado lang nga nabaton sang konseho amo ang magahatag si DPWH 6 Regional Director Engr. Sanny Boy Oropel sang ila plano kag resulta sang mga ginpatuman nga tests sa flyover.
Suno kay Trimañez, sang nagligad nga Marso 4, nagpasar ang konseho sang Pavia sang resolution nga nagapangayo sang update sa Ungka Flyover kag Aganan Flyover agud masabat ang mga palamangkutanon sang mga residente sang banwa.
Apang tubtob subong, wala sa gihapon nakapasa ang ahensya sang resulta kag mga plano sa masunod nga tikang para sa proyekto.
Ginpahayag man ni Trimañez nga nagpangayo sang pasensya si Engr. Oropel sa mga pumuluyo kag opisyales sa natuga nga huol bangud sa atrasado nga pagtukod sang flyover.
Ginalantaw naman sang natungdan nga magpangayo sang bulig sa senado agud ma-imbestigaran ang amo nga mga proyekto.
Nahibaluan nga ang United Technologies Consolidated Partnership (UTCP) ang una nga nagpatigayon sang soil test sang amo nga mga flyover apang nagaguwa nga may nagkalain-lain nga ini resulta.
Sa subong, liwat nga ipaidalum sang ahensya sa third-party consultation ang desinyo sang mga flyover agud matumod ang masunod nga tikang kag matapos ang proyekto.
