Ginapabaskog pa sang Department of Education (DepEd) Region 6 ang seguridad sa mga eskwelahan sa rehiyon paagi sa pag-develop sang “WeCare Assist” mobile application.
Sa interview sang Bombo Radyo kay DepEd 6 Regional Director Cristito Eco, iya ginpahayag nga sa oras nga matapos ang aplikasyon, gilayon ini nga ideploy sa mga pampubliko nga eskwelahan sa rehiyon.
Suno kay Eco, pagagamiton ang aplikasyon sang mga estudyante, maestro, ginikanan kag iban pa nga stakeholders agud madali nga mareport ang bisan ano nga ginadudahan nga hitabo nga posible magresulta sa indi maayo nga insidente sa sulod sang eskwelahan.
Dugang pa sini, target sang DepEd 6 nga ipaidalom sa pilot testing ang WeCare Assist Application sini nga bulan sang Hulyo antes ini ipatuman sa bug-os nga eskwelahan sa rehiyon.
Suno pa kay Eco, kabahin ini sang direktiba ni DepEd Secretary Sonny Angara nga padayon nga pabaskugon ang mga safety measures sa tanan nga eskwelahan.
Lakip diri ang hugot nga visitor management system, istrikto nga pagpatuman sang ID policy, regular nga inspeksyon kag monitoring, lakip na ang bag checking gamit ang metal detector, kag padayon nga koordinasyon sa mga local government units kag Philippine National Police.
Nagapanugyan man ang natungdan nga magpalapit sa ila mga maestro, guidance personnel, principal ukon school heads, ginikanan, ukon iban pa nga masaligan nga mas tigulang sa ila agud makabaton sang nagakaigo nga pag-giya.
Gina-engganyo man ni Eco ang mga ginikanan nga maghatag sang nagakaigo nga tion sa ila kabataan sa kada pagpauli sang mga ini halin sa eskwelahan paagi sa pagpangamusta sa ila adlaw, kag kun ano ang natabo sa ila sa eskwelahan, amo man ang pagpamati sa ila mga problema.
