Nabaton na sang Department of Education Region 6 (DEPED-6) ang incident report kaangot sa maestro nga ginreklamo nga nagpang-video kag nagling-ling sa non-teaching personnel samtang nagapaligo sa sulod sang improvised comfort room kadungan sang Iloilo Scout Invitational Jamboree sa Sub-Camp Tarangban, sa Brgy. Libot, Calinog, Iloilo.
Sa interview sang Bombo Radyo kay Mr. Hernani Escullar Jr., Spokesperson sang Department of Education Region 6, iya ginpahayag nga sa subong, indi pa nila mapadalman bangud man sa Magna carta nga provision para sa mga manunudlo.
Suno kay Escullar, na-endorse na nila sa appropriate nga mga opisina ang incident report kag yara na sa ila ang masunod nga mga legal nga tikang.
Ginpahayag man sini nga luwas sa himuon sang pila ka opisina nga mga tikang, ang imbestigasyon sang division office sa amo nga insidente ang separado.
Wala naman naghatag sang timeline ang natungdan kon san-o matapos ang imbestigasyon bangud madamo pa sang mga rekistos kag assessment ang maagyan sang report.
