Naga-isahanon ang Department of Education Region 6 sa mga rehiyon sa Pilipinas nga may Regional Achievement Measure nga naga-cover sang tanan nga grade levels.
Sang damlag lang, ginpakigbahin sa publiko sang Philippine Statistics Authory nga masobra 18 million nga mga junior and senior high school graduate sa pungsod ang indi makabasa kag makahangop.
Ang Regional Achievement Measure ang nagaserbe nga regional tool sa pag-assess kag pag-monitor sang performance sang estudyante sa literacy kag numeracy sa tanan nga grade levels.
Sa interview sang Bombo Radyo kay DepEd Region 6 Spokesperson Mr. Hernani Escullar, Jr., iya ginpahayag nga apisar wala pa sang impormasyon nga nabaton ang rehiyon kun sa diin nahamtang ang talatapan sa data sang PSA, may yara naman ini sang mga programa kag inventions nga nakahanda na.
Suno kay Escullar, kumpyansa ang Department of Education Region 6 nga nagahatag ini sang kalidad nga edukasyon sa mga learners.
Ginpakigbahin sang natungdan ang mga nagkalain-lain nga national kag regional programs sang DepEd kaangay sang Enhanced Regional Numeracy Test (ERUNT) sa idalom sang proyekto kaangay sang Pagbasa kag Pagsuma.
Dugang niya, nagaserbe nga potentional model para sa localized assessment kag targeted intervention ang proactive approach sang DepEd Region 6.
Magluwas sa talatapan, may yara man sang iban nga program nga suportado sang mga organisasyon kaangay sang Tib-ong Bumulutho Program sa diin naka-focus ini sa reading kag numeracy remediation activities.
Samtang sa Iloilo, ang Provincial Government sa kolaborasyon sang DepEd kag Synergia Foundation, may yara sang ginapatigayon nga pre-assessment tests sa Grade 3 learners sa probinsya agud maka-establisar sang baselines para sa reading competencies.
