Ginpatpat sang Department of Education (DepEd) Region 6 ang ila pag-address sa kaso sang bullying sa mga eskwelahan agud maprotektahan ang kaayuhan kag pagtuon sang mga estudyante.
Sa interview sang Bombo Radyo kay Mr. Hernani Escullar Jr., spokesperson sang DepEd Region 6, iya ginpahayag nga activated na ang Learners’ Rights Protection Officers kag focal persons sa tagsa ka eskwelahan nga maga-atubang sang mga reklamo kag isyu may kaangtanan sa bullying.
Suno kay Escullar, may mga intervention man halin sa guidance counselors agud mabuligan ang mga kabataan nga apektado sang bullying.
Ginpahanumdom man niya nga ang bisan sin-o nga may impormasyon ukon reklamo nahanungod sa bullying mahimo gid nga magreport sa mga responsable nga opisyal sa eskwelahan.
Dugang pa niya, dapat malikawan ang bisan ano nga potential risk nga mahimo makaapekto sa pagtuon kag mental state sang mga estudyante.
Indi man luyag sang DepEd nga may mga kabataan nga mag-drop out bangud sang bullying.
Bangud sini, gin-activate sang ahensya ang mga opisyal nga mahimo mapalapitan sang mga kabataan agud masiguro nga mahatagan sang nagakaigo nga tikang ang ila mga concerns.
