Nagaplano ang Department of Education (DepEd)-6 nga i-integrate sa curriculum ang mga isyu nga may kaangtanan sa West Philippine Sea agud mapataas ang kaalam sang mga estudyante kag manunudlo parte sa maritime rights sang Pilipinas.
Sa interview sang Bombo Radyo Iloilo kay Leonel Salvilla, spokesperson sang DEPED – Schools Division of Iloilo, iya ginpahayag ang importansya sang husto kag updated nga impormasyon parte sa mga nagakatabo sa West Philippine Sea agud nga ma-edukar ang publiko ilabi na ang mga kabataan.
Suno kay Salvilla, daku ang nabulig agud mapalig-on ang ihibalo sang mga manunudlo sa nangin kolaborasyon sang DEPED sa Philippine Coast Guard sa ginpatigayon nga West Philippine Sea symposium nga gintambungan sang mga manunudlo halin sa nagkalain-lain nga bahin sang Western Visayas.
Pahayag man niya nga ginaprioridad ang mga Social Studies teachers agud masiguro nga husto ang impormasyon nga ila igatudlo sa mga estudyante angut sa West Philippine Sea.
Ginpahayag man ni Salvilla nga kinahanglan nga mahatagan ang mga manunudlo sang bastante kag nagakaigo nga training, amo man ang mga instructional materials nga mahimo magamit sa classroom agud nga mas mahangpan sang maayo sang mga estudyante ang leksyon.
Ginpakigbahin man niya nga nagpakig-angot na ang Iloilo Schools Division sa Iloilo Provincial Government para sa pag-capacitate sang mga manunudlo kag pag-develop sang mga materyales nga mahimo i-integrate sa curriculum.
Dugang pa ni Salvilla, ang importansya sang pagpalig-on sang kolaborasyon sang nagkalain-lain nga institusyon kag ahensya ang tuman ka importante agud mapauswag ang maritime education kag mapataas ang awareness sang publiko parte sa West Philippine Sea.
