ILOILO – All set na ang Department of Education para sa pagbukas sang klase sa public Elementary kag High Schools sa Oktubre 5.
Sa interview sang Bombo Radyo kay Dr. Roel Bermejo, DepEd-Iloilo Schools Division Superintendent, iya ginpahayag nga sa subong, ang printed modules nga pagagamiton para sa una nga bulan sang klase halin sa Elementary tubtub sa High School ang natapos na sa pag-print kag igasunod naman ang modules nga pagagamiton sa mga masunod nga bulan depende sa masarangan sang available funds halin sa Department of Education, Local Government Unit kag partner agencies.
Suno kay Bermejo, bangud nga blended learning ukon nanari-sari nga modalities ang pamaagi sang pagtudlo, may yara sang contingency plan nga ginpreparar ang mga manunudlo depende sa sitwasyon kag ikasarang sang estudyante.
Ginpahayag ni Bermejo nga bangud may yara sang online learning, indi malikawan nga may yara sang problema sa signal ukon power interruption nga matabo, nagpatigayon na nga daan sang dry run ang Department of Education.
May yara naman sang identified home based tutor ukon volunteer learning facilitator agud nga magbulig sa pagtudlo sa elementary students ilabi na kun ang ginikanan ukon guardian ang wala sang ikasarang sa pagtudlo.
Santo sa survey suno sa natungdan, masobra sa 90% ang nagpili sa modular learning kun sa diin ang modules ang ginalakipan sang printed kag digital.
Nahibalu-an nga sa blended learning, ang pagagamiton nga modalities amo ang TV kag Radio-based learning, online learning kag ang paggamit sang modules.
