ILOILO CITY – Gin-athag sang Department of Education nga nahitso na ang away sa tunga sang mga delegado sang 4th kag 5th District matapos ang natabo nga hampang sa Baseball Secondary sa Iloilo Schools Sports Council Meet 2019.
Nahibalu-an nga sa ginpatigayon nga hampang, nag walk-out kag nagpamuyayaw ang mga delegado sang Anilao matapos nga wala naluyagan ang desisyon sang umpire pabor sa Barotac Viejo.
Sa interview sang Bombo Radyo kay Dr. Gilbert Solidum, pinuno sang School Governance and Operations Division sang Department of Education – Division of Iloilo, iya ginpahayag nga nasolbar na ang indi pag-intindihanay sang duha ka team.
Suno kay Solidum, indi pa man matumod kun bala ang nagpamuyayaw amo ang coach, player, technical officials ukon tumalan-aw.
Ginpahayag ni Solidum nga kun mapamatud-an ang nga isa sa mga coach, player ukon technical official ang nagpamuyayaw, mismo sila sa Department of Education ang magahatag sang nagakaigo nga silot.
Kun mapamatud-an nga tumalan-aw ang nagpamuyayaw suno kay Solidum, indi na ini sakop sang Department of Education.
Sa pihak sini, ginpasalig sang natungdan nga may yara sang rule book nga ginasunod sa tagsa ka hampang nga ginapatigayon.
