ILOILO CITY- Ginaduso sang grupo sang mga manunudlo kag ginikanan ang pagpaisol sang natalana nga pagbukas sang klase sa Agusto.
Sa interview sang Bombo Radyo kay Atty. Emilio ‘Jun’ Abelita, anay Department of Education Assistant Secretary kag partylist representative sang Parents Teachers Alliance, iya ginpahayag nga indi pa handa ang Department of Education sa pagpatuman sang blended learning.
Suno kay Atty. Abelita, mangin dako nga pagpanghangkat ang connectivity sa internet para sa online learning kag ang indi uniform nga modules nga ihatag sa mga estudyante.
Ginpakamalaot naman ni Abelita ang Department of Education bangud sa pagpapas-an sa mga manunudlo sang paghimo sang mga modules nga dapat kuntani katungdanan na sang curriculum bureau sang ahensiya.
Pahayag pa niya, kaangay nga ginahimo lang sang Department of Education nga “guinea pigs” ukon gina-ekspermentuhan lang ang mga manunudlo, estudyante, kag ginikanan.
Ginhangkat naman sang natungdan si Department of Education Secretary Leonor Briones nga akuon kay Presidente Rodrigo Duterte nga kulang pa ang preparasyon sang sektor sang edukasyon para sa pagsugod sang school year.
