ILOILO CITY- Madamo sang ginakonsidera nga mga bagay ang Department of Education sa paghimo sang mga modules para sa liwat nga pagbukas sang klase para sa school year 2020-2021.
Sa interview sang Bombo Radyo kay Dr. Ruby Therese Almencion, isa ka education supervisor, iya ginpahayag nga sa paghimo sang tagsa ka modules kinahanglan nga hatagan sang pagtamod ang values nga dapat matun-an sang mga kabataan.
Suno kay Almencion, apisar nga nagkalain-lain nga sahi sang modalities ang kuhaon sang isa ka estudyante, palareho man sa gihapon ang unod sang tanan nga mga modules.
Magluwas sa values nga dapat kabahin sang modules, kinahanglan man nga mapasigurado nga ang tanan nga mga learning materials ang nakaagi sa quality assurance agud masigurado nga maayo ang kalidad sang mga materials.
Pahayag pa niya lakip sa ginacheck sa quality assurance amo ang format sang sript, kun may yara sang values nga matun-an ang mga kabataan, updated ang mga data, lakip na ang husto nga mga impormasyon nga nasulat sa tagsa ka modules.
