DepEd ginkondena ang pagpatay sa assistant principal sa Iloilo

ILOILO CITY – Ginkondenar sang Department of Education (DepEd)-Iloilo ang brutal nga pagpatay sa assistant principal sang Cabatuan National Comprehensive High School nga si Dante Roldan.
Sa interview sang Bombo Radyo Iloilo, ginpahayag ni Dr. Ferlisa Beriong, OIC schools division superintendent sa Iloilo, nagakasubo sila sa gindangatan sang assistant principal.
Dako nga kawad-anan suno kay Beriong ang assistant principal nga nasapwan nga wala sang kabuhi kahapon sa talamnan sang tubo kag ginlampusan sang bato sa ulo.
Madamo pa suno kay Beriong sang plano si Roldan para sa eskuwelahan kun sa diin ini nagpangalagad sa sulod na sang 40 ka tuig.
Mabuot nga tawo suno sa mga ini ang biktima, rason nga handum nila ang hustisya sa kamatayon sini.
Samtang nagapati naman ang mga co-teachers sang biktima nga hold-up ang rason sa pagpatay sa assistant principal.
Ginpahayag sa Bombo Radyo ni Vicente Lauro, principal sang Cabatuan National Comprehensive High School nga nadula ang wallet kag malahalon nga mga gamit sang biktima.