ILOILO CITY – Handa na ang Department of Education sa patigayunon nga enrollment umpisa sa Hunyo 1 – Hunyo 30.
Sa interview sang Bombo Radyo kay Dr. Lea Belleza, information officer sang Department of Education 6, iya ginpahayag nga mahimo lamang nga ipaagi sa online ukon sa hotline number ang enrollment sang mga estudyante.
Suno kay Belleza, mahimo man nga magpakig-angot ang ginikanan sa mga manunudlo agud nga mapadali ang pagproseso sang requirements ukon indi gani, mahimo man nga magpalapit sa booth nga ginpahamtang sa tagsa ka mga barangay para sa pagpasa sang requirements.
Ginpahayag ni Belleza nga may yara sang memorandum nga ginpaguwa ang central office kun sa diin nakasaad nga wala sang may matabo nga face-to-face interaction sa enrollment ilabi na humalin Hunyo 1 tubtub 5 kag wala man nalakip sa option ang face-to-face classes.
Kadungan sini, nakahanda naman ang ahensya sa labing una nga virtual national kick-off sang Brigada Eskwela kag Oplan Balik Eskwela kun sa diin ginahingyo ang tanan nga partner sang Department of Education nga magdonar sang modules, internet connections kag gadgets para sa ginaduso nga Blended Project-Based Learning.
