Ginpasiguro sang Department of Education-Schools Division of Iloilo nga may klaro nga patakaran ang ahensya kun may linog, kag may proseso nga ginasunod antes magdesisyon sa pagsuspende sang klase.
Sa interview sang Bombo Radyo kay Leonil Salvilla, spokesperson sang DepEd-Schools Division of Iloilo, suno sa iya padayon pa ang pagkuha sang mga report halin sa mga eskwelahan kag field offices parte sa epekto sang 4.2 magnitude nga linog nga natabo.
Suno kay Salvilla, nga tanan nga disasters nga posible maeksperyensyahan sang komunidad, may yara sang mga protocol nga ginasunod.
Kun linog ang pagaistoryahan, klaro sa patakaran sang DepEd nga kun ang intensity sang linog nga na-record sang PHIVOLCS amo ang 5 ukon mas manubo pa, wala sang automatic nga pagsuspende sang face-to-face nga klase kag trabaho.
Ang desisyon yara sa local chief executives kun kinahanglan nga suspendiron ang klase ukon trabaho.
Ginpabutyag pa ni Salvilla nga pwede man nga localized ang pagsuspende sang klase depende sa sitwasyon kag assessment sang mga school personnel, pero kinahanglan nga may koordinasyon ini sa lokal nga panguluhan. Kun may pagsuspende, dayon nga magshift ang eskwelahan sa modular distance learning.
Apang kun ang intensity sang linog amo na ang 6 ukon mas mataas pa, automatic na nga suspendido ang klase sa lugar nga apektado.
Ginpaathag man ni Salvilla nga gina-reiterate sang DepEd nga indi dapat pag-pressuron ang mga lokal nga panguluhan kag eskwelahan nga magdesisyon dayon sa pagsuspende sang klase sa gamay lang nga pagtay-og bangud may yara sang protocol nga ginasunod kag indi gusto sang ahensya nga ma-kompromiso ang pagtuon sang kabataan.
Ang pinaka-punto suno sa iya amo nga kun ang ginikanan nagapati nga indi na safe para sa ila kabataan nga magbalik sa eskwelahan, sila ang may pinakauna nga responsibilidad sa pagdesisyon para sa kaayuhan kag interes sang ila mga kabataan.
“Kun ang ginikanan ya nagapati nga indi na safe para sa ila kabataan nga magbalik sa eskwelahan then they have the primary responsibiltity to decide for best and interest of their children,” pahayag ni Salvilla.
