Gin-ako sang Department of Education- Schools of Division of Iloilo nga isa sa mga pagpanghangkat sa pagpatuman sang mga programa para sa mental health kag learners protection amo ang kakulangan sang mga guidance counselors sa mga pampubliko nga buluthuan.
Sa interview sang Bombo Radyo kay Mr. Leonil Salvilla, tagpamaba sang DepEd Iloilo, iya ginpahayag nga dako ang epekto sang kakulangan sang guidance counselors bangud sila kuntani ang nagapanguna sa paghatag sang counseling, psychosocial support, kag gilayon nga interbensyon sa mga estudyante nga nagaeksperyensiya sang emosyonal ukon mental health concerns.
Suno kay Salvilla, samtang wala pa sang guidance counselor ang isa ka eskwelahan, pwede sila nga mag-assign sang coordinator nga magapanguna sa pagpatuman sang mga programa sa mental health sang mga estudyante.
Gindugang man ni Salvilla nga dako man nga bulig sa DepEd ang mga programa sang Local Government Units kaangay sang Teen Centers agud ma-address ang pila ka mga isyu nga ginapangatubang sang mga learners ilabi na ang mga menor de edad.
