DepEd, magapatigayon sang nationwide active-threat drill sa Agusto 25

Magapatigayon ang Department of Education (DepEd) sang nationwide simultaneous drill sa Martes, Agusto 25, agud nga mahibaluan kag matakos kun ano ka handa ang mga eskwelahan sa pagresponde, pag-evacuate, kag pagtipon sang mga estudyante sa tion nga may pamahog ukon pagpang-atake sa sulod sang campus.

Suno kay DepEd Undersecretary Malcolm Garma kadungan sa ginpatigayon nga Senate hearing, nabalay na sang ahensya ang mga protocol para sa amo nga drill.

Nagpakig-angot man sila sa Philippine National Police (PNP) kag sa Department of the Interior and Local Government (DILG) para sa amo nga aktibidad.

Una na ini nga ginpatigayon sa Manila Science High School.

Suno kay Garma, lain ini ipaanggid sa ordinaryo nga earthquake drill bangud hibaluon diri kun paano magresponde ang mga estudyante kag school personnel samtang nagakatabo ang isa ka pamahog kag kun ano ang himuon gilayon pagkatapos sang insidente.

Isa sa pinakaimportante nga bahin sang drill amo ang reunification stage kun sa diin may natalana nga lugar nga pagatipunan sang mga estudyante, ginikanan, medical responders, kag kapulisan.

Ginpahayag ni Garma nga isa sa mga leksyon nga natun-an sang DepEd halin sa shooting incident sa Tacloban amo ang kagamo pagkatapos sang insidente bangud wala gilayon nahibaluan sang mga estudyante kag ginikanan kun diin sila magkadto.

Suno pa kay Garma, importante ang kahanda, kaandam kag ihibalo sang mga eskwelahan agud makaresponde gilayon kon may nagakatabo nga threat ukon pagpanakit sa mga kabataan.

Mahimo man suno sa opisyal nga mangin deterrent ukon makapugong sa mga posible nga manug-atake kon nahibaluan nila nga may klaro kag established nga proseso ang mga eskwelahan sa pag-atubang sang amo nga sitwasyon.

Samtang, suno naman kay Senator Risa Hontiveros, chair sang Senate Committee on Women, Children, Family Relations and Gender Equality, kinahanglan na sang mga eskwelahan ang mga protocol kag drill para sa human-induced threats, kag indi lamang magsandig sa naandan nga earthquake drills pareho sang “duck, cover and hold.”

“It’s just sad, but a reality today na kailangan tuloy magkaroon ng protocols and drills on active human-induced threats. So hindi na lang po yung usual na earthquake drills natin na duck, cover and hold,” suno sa senadora.

Nahibaluan nga ang hearing sa Senado ang kaangot sa natabo nga school shooting sa Tacloban kag sa Zamboanga kun sa diin may kabuhi nga nagkaladula.#