ILOILO CITY — Magapatigayon sang psychosocial interventions ang Child Protection Committee sang Department of Education (DepEd) sa mga apektado nga kilala kag manunudlo sang estudyante nga naghikog matapos nga ginhatagan sang line of 6 nga grade sang iya maestra.
Sa interview sang Bombo Radyo kay Mr. Leonil Salvilla, spokeperson sang DepED Schools Division of Iloilo, iya ginpahayag nga nagapalab-ot sang pag-unong kag kasubo ang central office sa pamilya sang Grade 10 student sa Maasin, Iloilo nga naghikog.
Suno kay Salvilla, samtang nagahulat pa sa official police report kag findings, magapatigayon sang koordinasyon ang mga otoridad sa pamilya sang nasambit nga estudyante.
Nahibaluan nga ang biktima ang ikatatlo sa apat ka mag-utod sa diin nasapwan na lang ini sang iya pamilya nga nagabitay na sa ibabaw sang kahoy malapit sa bubon sang Mayo 10.
Nagbilin naman ini sang suicide letter sa iya iloy sa diin nasaad nga indi na siya makaagwanta project nga ginhatag sa iya maestra.
Ini nga proyekto amo ang pagluto sang pagkaon.
Ginpahayag sang estudyante nga ang rason sang paghikog sini amo ang paghatag sang iya maestra sang grade nga 64 sa 1st quarter, 69 sa 2nd quarter kag 66 sa 3rd quarter sa subject nga Edukasyong Pantahanan at Pangkabuhayan (EPP).
Nagahingyo naman ang ahensya sa publiko nga likawan ang pagpalapta sang mga indi kumpirmado nga impormasyon bilang respeto sa pamilya sang estudyante.
