Magapatuman ang Department of Education (DepEd) sang wellness break umpisa Oktubre 27 tubtob 30, para sa mga manunudlo kag estudyante.
Tinutuyo sini ang mahatagan sang pahuway ang mga manunudlo antes ang midyear In-service Training (INSET).
Suno kay Education Secretary Sonny Angara, nabatian nila ang panawagan sang mga teachers sa tion sang pagbisita sa mga eskwelahan rason nga nagdesisyon sila nga hatagan sila sang panahon para makapahuway kag makaupod ang ila mga pamilya.
Dugang pa niya, madamo sa mga teacher kag estudyante ang apektado sang bagyo, linog, kag sakit kaangay sang trangkaso.
Ginpahanagutan ang mga eskwelahan nga kay-uhon ang ila schedule.
Ang mga nauna nga nagplano sang INSET ang possible nga mag-reschedule ukon ipadayon ini sang boluntaryo.
Maga-umpisa liwat ang klase sa Nobyembre 3, matapos ang tigkalalag.
