ILOILO CITY – Nagakadapat nga magpangita sang paagi ang Department of Education kun ano pa gid ang mga alternatibo agud nga mapadayon ang pagtuon sang mga estudyante.
Ini ang pahayag ni Iloilo City Mayor Jerry Treñas may kaangtanan sa luyag sang ahensya nga sa Agosto 24 magabukas ang klase para sa subong nga school year.
Sa interview sang Bombo Radyo kay Treñas, iya ginpahayag nga dapat tun-an sang maayo kun bala padayunon ukon ipaiway anay ang klase bangud sa kahangawa nga maglapta ang Coronavirus Disease 2019 (COVID-19).
Suno kay Treñas, kun kinahanglan nga ipaagi sa online ang klase, kinahanglan nga may yara sang maayo nga internet connection, may yara sang bastante nga computer ukon laptop kag kinahanglan nga ang tanan nga manunudlo ang makahibalo maggamit sang nasambit nga devices.
Kun siya lang ang pamangkuton, indi niya marisgo ang ikaayong lawas sang mga estudyante rason nga iya ginhingyo kay Sec. Leonor Briones nga sa masunod na lang nga tuig padayunon ang pagbukas sang klase.
