Nagpaguwa na sang memorandum ang Department of Education (DepEd) sa mangin preparasyon para sa pilot face-to-face classes sa mga eskwelahan.
Nasaad sa Memorandum No. 071, ukon “Preparations for the Pilot Face-to-Face, Expansion and Transitioning to New Normal” nga tanan nga pampubliko nga eskwelahan sa pungsod ang dapat nga magpatigayon sang self-assessment gamit ang School Safety Assessment Tool (SSAT) bilang preparasyon para sa expansion phase kag padayon nga pag-transition sa new normal sang face-to-face.
Samtang ang gin-identify nga 59 ka mga pilot schools ang magahanda man para sa pag-umpisa sang face-to-face classes sa Nobyembre 15, 2021.
Ang mga pribado nga eskwelahan ang dapat man nga magpatigayon sang self-assessment pinaagi sa SSAT nga magadetermina sang “level of readiness” ukon kahandaan para sa safe nga face-to-face kag magahatag sang indikasyon sa kun ano pa ang kinahanglan i-improve ukon i-adjust.
Ang mga pribado nga eskwelahan nga luyag makaupod sa 20 ka mga pilot schools para sa in-person classes ang nagakadapat nga magpasa sang dokumento sa DepEd regional director, kalakip na ang letter of intent, proposed implementation plan, contingency plan, kag accomplished SSAT, kag ipasa sa Office of Regional Director, antes ang Oktubre 22, 2021.
Samtang ang mga international schools naman ang pahanugutan nga magpatuman sang in-person classes sa guwa sang 120 pilot schools.
Sa tion nga makapasa na sang proposal , ini ang i-evaluate sang DepEd kag sang Department of Health kag ipasa ang resulta sa Inter-Agency Task Force para sa approval.
Sa tion nga maaprubahan, mahimo na nga mag umpisa sang face-to-face classes apang siguruhon nga may yara man ini sang approval halin sa local government unit kag sa mga ginikanan sang kabataan.
Sa Region 6, isa ka eswelahan sa Aklan kag duha sa Antique ang nalakip sa 59 ka mga pilot schools nga nakapasar sa risk assessment sang DOH.
