ILOILO CITY – Nagpangayo sang pasaylo ang Department of Education (DepEd) may kaangtanan sa learning module nga nagapakalain kay Vice President Leni Robredo.
Sa ginpagwa nga statement sang Schools Division Office (SDO) sang Manila, gin-ako sang division nga wala nakaagi sa maid-id nga review ang amo nga module.
Nagpangayo man sila sang pasaylo kay Asec. Malcolm S. Garma, anay Regional Director sang DepEd-NCR, kag sa nabilin nga katapo sang NCR team nga na-mention nga kabahin sang management team sa copyright section sang amo nga material.
Ang self-learning module para sa Grade 11 students ang naglapta sa social media nga nag-mention sang pangalan ni Robredo kag nagapamangkot sa mga estudyante nga tumuron ang headline nga wala sang sala sa spelling, grammar kag content.
Ang apat ka mga choices ang nagapakalain man sa bise presidente bangud daw kaangay nga ginabasol sini ang gobyerno sa indi maayo nga pagsapubliko sang quarantine rules.
Ang pangalan ni Robredo ang liwat nga gingamit sa apat ka mga choices sa masunod nga pamangkot kun sa diin, ginapa-identify sa mga learners ang statement nga nagaunod sang unsubstantiated generalizations.
Ang amo nga mga pamangkot ang kabahin sang subject nga “Introduction to the Philosophy of Human Person.”
Natigayon man nga na-identify sang SDO Manila ang nagsulat sang amo nga module apang ini ang napatay na bangud sa COVID-19.
Nagmandu naman ang division office sa mga school heads nga bawion ang mga hard copy sang learning modules nagikan sa mga estudyante.
Ginmanduan man ang mga in charge sa Learning Resource Management portal nga i-take down ang amo nga module sa online platform.
Samtang, magapatigayon naman sang imbestigasyon ang DEPED sa mga persona nga kabahin sang mga naghimo sang amo nga module.
