Nagpatuman sang adjustment sa guidelines ang Department of Education central office pinaagi sa flexible working arrangement para sa ila mga opisina bilang kabahin sang ginapatuman nga four-day work week.
Suno sa patakaran, Lunes tubtob Huwebes ang onsite nga trabaho sa opisina samtang ang Biyernes ang work-from-home arrangement sang mga empleyado.
Sa interview sang Bombo Radyo kay Hernani Escullar, spokesperson sang DepEd Region VI, ginpahayag niya nga kabahin ini sang tikang sang ahensya agud makatipid sa operational expenses.
Samtang sa pihak nga bahin, padayon naman nga magasunod ang mga teaching personnel sa gin-set nga schedule sang end of school year rites.
Suno sa DepEd, Marso 19 tubtob 20 ang final examinations, samtang Marso 23 tubtob 27 ang pagpatigayon sang recognition day para sa mga kabataan, samtang Marso 30 tubtob 31 naman ang gin-set nga schedule para sa end of school year rites.
Dugang pa ni Escullar nga ginapahanumdom sang ahensya ang mga eskwelahan nga magpatuman sang no collection policy sa pagpatigayon sang end of school year rites, bangud tanan ng expenses ang ginakuha sa Maintenance and Other Operating Expenses (MOOE) sang eskwelahan.
Gina-emphasize man sang DepEd sa mga manunudlo, estudyante kag attendees nga siguruhon ang maayo nga ventilation sa mga lugar nga pagahiwatan sang moving-up kag recognition ceremonies agud masiguro ang kaayuhan kag kaluwasan sang tanan.
