Nagpangayo na sang pasaylo ang Department of Education matapos naglapta sa social media ang isa ka module nga nagaunod sang isa ka halimbawa sa diin ginatawag si Angel Locsin nga obese ukon tuman katambok.
Suno kay Roger Capa, superintendent sang Department of Education Division sa Occidental Mindoro, nahibaluan sa ila imbestigasyon nga “teacher-made assessment” ang nasambit nga module kag indi inobrahan sang ila Central Office.
Pahayag ni Capa, nga may kahilway ang manunudlo nga mag-obra sang mga assessment materials para sa mga estudyante apang lain ang nangin sitwasyon subong bangud wala nasunod ang “standards.”
Dugang pa sang natungdan nga naistorya na nila ang manunudlo kag tagaan nila sang nagakaigo nga atensyon ang insidente bangud wala nila ginakunsinti ang mga bagay nga may kaangtanan sa bullying.
Sa bahin naman sang 35 anyos kag artista nga si Angel Locsin, indi big deal sa iya ang mga pagpangdaugdaug apang nagakabalaka siya sa mga sala nga grammar kag bad behavior nga ginatudlo sang nasambit nga ahensya.
