Nagpirma sang Memorandum of Agreement ang Department of Education (DepEd) – Schools Division of Iloilo, Philippine Drug Enforcement Agency (PDEA), kag Philippine National Police (PNP) agud mapasangkad pa gid ang anti-drug campaign sa tanan nga public schools sa probinsya.
Kasunod man ini sang pagkarekober sang iligal nga druga sa isa ka estudyante sa Janiuay, Iloilo sa sulod mismo sang eskwelahan.
Kabahin sang kasugtanan amo ang pagpatigayon sang PDEA sang “training of trainers” para sa mga teachers kag school heads.
Ini agud masiguro ang lapnagon nga pagpalapta sang impormasyon sa paglikaw sa druga.
Sa bahin sang PNP, plano sini nga mag- integrate sang special module sa Good Manners and Right Conduct (GMRC) subject para sa mga Grade 7 tubtob Grade 10 nga mga estudyante.
Ini nga module ang magasakop sang mga topiko kaangay sang negatibo nga epekto sang paggamit sang illegal drugs.
Ang papel naman sang DepEd ang magasentro sa pag- schedule sang “training of trainers” kag mapasiguro ang tayuyon nga integration module sang PNP sa nagaeksister nga curriculum.
Target nga makompleto ang pagpatuman sini nga mga plano sa Oktubre.
