Gina-welcome sang Department of Education ang proposal sang Iloilo Provincial Government nga i-integrate sa curriculum ang driving course kag road safety education para itudlo sa mga estudyante.
Sa interview sang Bombo Radyo kay Mr. Leonil Salvilla, spokesperson sang Department of Education- Iloilo, iya ginpahayag nga kun matigayon ini, dako ini nga bulig para mas magsangkad ang ihibalo sang mga kabataan sa amo nga patag.
Suno kay Salvilla, sa subong ginahulat nila ang koordinasyon sang provincial government sa Department of Education- Iloilo kun ano ang masunod nga mga tikang angot diri.
Pahayag ni Salvilla, pwede ini ma-integrate sa subject nga Araling Panlipunan ukon sa Health.
Dugang niya, kun matigayon ini, kinahanglan nga hanason man ang mga manunudlo nga in-charge, sa bulig sang mga ahensya sang gobyerno agud nga mas mangin epektibo ang pagtudlo sini.
