Matapos ang National Simultaneous Earthquake Drill nga ginpatigayon sang nagligad nga Hunyo 18, natukiban sang DepEd Schools Division of Iloilo nga preparado ang mga estudyante sa mga buluthuan sa probinsya sang Iloilo, apang may pila ka eskwelahan nga may ara sang kakulangan sang evacuation area.
Sa interview sang Bombo Radyo kay Mr. Leonil Salvilla, spokesperson sang DepEd Schools Division of Iloilo, iya ginpahayag nga amo ini ang isa sa mga naobserbahan sang ila team sa tion sang drill.
Suno sa iya, may mga eskwelahan nga gamay lamang ang bakante nga lugar nga mahimo gamiton bilang evacuation area.
Pahayag pa ni Salvilla may ara na sang nahamtang nga protocols kag options ang mga buluthuan agud masiguro ang seguridad sang mga estudyante kon may matabo nga linog.
Dugang pa niya, pamilyar naman ang mga personnel sa nagakaigo nga mga pamaagi sa emerhensya kag kinahanglan lamang nga padayon nga i-practice ini agud mahimo ini nga insakto sa aktwal nga kalamidad.
Ginpunto man ni Salvilla ang importansya sang presence of mind kag pagpahibalo sa kada estudyante kag personnel kon ano ang dapat himuon sa tion sang linog agud maprotektahan ang ila nga kabuhi.
