ILOILO CITY- Ginadiskusyunan na sang Department of Education (DepEd) upod sa Civil Service Commission kag Commission on Higher Education ang pagpamag-an sang requirements sa pag-hire sang guidance counselors, partikular ang pagdula sang master’s degree.
Ginsuhestiyon ni Education Secretary Sonny Angara ini nga “temporary solution” agud ma- address ang ginakulang nga numero sang guidance counselors sa pungsod.
Suno sa iya, nabudlayan ang DepEd nga mapun-an ang malapit 5,000 vacancies para sa posisyon bangud sa master’s degree requirement.
Pahayag niya, indi na dapat kinahanglan ang master’s degree kag sa baylo, hatagan sila sang lima ka tuig nga grace period para makuha nila ang kinahanglanon nga credentials.
Dugang sang education chief, ang layi ang kinahanglan nga amyendaran agud madula ang nasambit nga requirement.
Nahibaluan nga magluwas sa master’s degree,ang guidance counselors kinahanglan nga makapasar sa licensure examination.
Sa pihak naman sang mabudlay nga qualifications,ang entry-level guidance counselors ang may yara lang sang Salary Grade 11, nga katumbas sang Teacher 1 designation nga sweldo nga P27,000.
