Nagpaggwa sang pagsulundan ang Department of Education (DepEd) sa evaluation sang mga self-learning module sa quarter 3 kag 4 para sa school year 2020-2021.
Sa interview sang Bombo Radyo kay Leonil Salvilla, spokesperson sang Department Of Education Schools Division of Iloilo, iya ginpahayag nga ang nasambit nga evaluation amo ang nasaad sa DepEd Order 001 series of 2021.
Katuyuan sini suno kay Salvilla nga mapasiguro nga mapaagi sa quality assurance check ang mga self-learning module nga gamiton sa mga eskwelahan.
Magluwas diri, katuyuan man sang evaluation amo ang pagganyat sa mga interesado nga pribado kag pampubliko nga entities, mga unibersidad kag eskwelahan nga luyag magventure sa printing kag publication sang amo nga mga module.
Pinaagi sa quality assurance check evaluation, siguraduhon sang DepEd nga developmentally appropriate, comprehensive kag self directed ang mga module.
Buot silingon suno kay Salvilla, sa tion nga ihatag sa mga estudyante ang module, bisan wala sang bulig sang mga manunudlo, mangin independent ang mga estudyante sa pagsabat kag mapasangkad ang ila nga learning performance.
Sa subong suno sa natungdan, ginalantaw sang DepEd nga naka-adjust na ang mga estudyante lakip na ang mga ginikanan kag manunudlo sa distance learning pinaagi sa mga self-learning module.
