ILOILO CITY – Gin-athag sang Department of Education Region VI nga boluntaryo lamang ang papasakup sang mga estudyante kag manunudlo sa National Learning Camp nga hiwaton sa Hulyo 24 tubtob Agosto 25.
Ang National Learning Camp ang kabahin sang National Learning Recovery Program nga may katuyu-an nga ma-address ang learning loss.
Ang tatlo ka adlaw ang para sa teacher-learner engagement kag ang duha ka adlaw naman ang para sa collaborative expertise pinaagi sa Learning Action Cell sessions sa mga manunudlo.
Sa interview sang Bombo Radyo kay Mr. Hernani Escullar, Jr., spokesperson sang Department of Education Region VI, iya ginpahayag nga gin-reiterate sa Regional Memorandum No. 539, series of 2023 nga boluntaryo lamang ang partisipasyon sa nasambit nga aktibidad.
Suno kay Escullar, ini ang magasugod sa Grades 7 kag 8 nga magatutok sa English, Science, kag Mathematics.
Base sa specific needs sang mga estudyante, nagakadapat nga magpa-enroll sila sa isa sa tatlo ka mga camps nga amo ang Enhancement Camp, Consolidation Camp, ukon Intervention Camp.
Katuyuan man sini nga magdihon sang camp-like atmosphere pinaagi sa pag-integrate sang masadya kag engaging activities agud nga mag-promote sang interes sang mga learners, socio-emotional skills, personal growth, kag character development.
